شعرترکی شب چله ( یلدا)

شعر ترکی شب چله ( یلدا )

ای سنت دیرینه ی ایران شب چله
قارپیز کسرم آدیوا قربان شب چله

سابق بو گئجه کرسی لر ائوده قورولاردی
بیر گردکان هر پایه سی اوسته اُوولاردی
قاقّیلتی دوشوب قیله قولاقی بورولاردی
شادلیق چوخالیب پاسلی اورکلر دورولاردی
ائو اهلی بوتون خرّم و خندان شب چله

قار کوچه ده دامدان اوجا ، کوچه باجا بوزلیق
ملّت هامیسی کئفده نه آجلوق نه سوسوزلیق
سو قیمتینه هر نمنه بوللوخ اوجوزلیق
شیرین ناغیلا کرسی باشیندا یوخوسوزلیق
ائل طایفا گلردی بیزه مهمان شب چله

داش بارداقین حوضیک ده کی پقیلداماقیندان
کرسی اوسته کومور سمَاوری تُقیلداماقیندان
تازه گلینون سوز باشی پقّیلداماقیندان
شیرین ننه نین هر گئجه نقَیلداماقیندان
وار سس قولاقیمدا هله پنهان شب چله

اما بو گئجه قارپیز اولوب افضل اعمال
قارپیز کسنه یوز چوورَر شانسیلا اقبال
قوچ قیمتینه قارپیز آلا بول سن اگر آل
گئت وام گوتی آل کفلته تلخ اولماسین احوال
قارپیزسیز اولا صبح یوخ امکان شب چله

قارپیز نئجه قارپیز دیه سن قرمزی قاندی
یوخ قان دئمه قارپیز بابا قانداندا گراندی
بیچاره کاسیب باخما کناردان ، گئچ آماندی
هم طبعی سویوخ همده وباسیره زیاندی
طولانیِ شب های زمستان شب چله

شعر : استاد کریمی مراغه ای